பாஜகவில் தேசிய பதவியா? - அண்ணாமலை சஸ்பென்ஸ் பதில்

மதுரையில் தமிழ்நாடு பாஜகவின் மாநில, மாவட்ட, மண்டல நிர்வாகிகள், பொறுப்பாளர்கள் கூட்டம் நேற்று நடந்தது. இதில் சிறப்பு விருந்தினராக பங்கேற்ற உள்துறை அமைச்சர் அமித்ஷா பாஜக - அதிமுக கூட்டணி தொடர்பாக கட்சியின் பிரதான தலைவர்களுடன் முக்கிய ஆலோசனை மேற்கொண்டார். மேலும், கட்சியினருக்கு சில முக்கிய அறிவுறுத்தல்களையும் வழங்கினார்.

இக்கூட்டத்தில் தமிழக பாஜக தலைவர் நயினார் நாகேந்திரன், தமிழிசை செளந்திரராஜன், எல்.முருகன், ஹெச்.ராஜா, அண்ணாமலை, பொன். ராதாகிருஷ்ணன், வானதி சீனிவாசன், தமிழ்நாடு பாஜக பொறுப்பாளர்கள் அரவிந்த் மேனன், சுதாகர் ரெட்டி உள்ளிட்ட பலர் பங்கேற்றனர்.

மேடையில் அமித்ஷாவுக்கு வலது பக்க இருக்கையில் மாநிலத் தலைவர் நயினார் நாகேந்திரன் அமர்ந்திருந்த நிலையில், இடதுபக்க இருக்கையில் அண்ணாமலை அமர்ந்திருந்தார். முன்னதாக விழா அரங்குக்கு அண்ணாமலை வருகை தந்தவுடன் கூடியிருந்த பாஜகவினர் அவருக்கு உற்சாக வரவேற்பு அளித்தனர். கைதட்டல், விசில் சத்தம் பறந்தது, பாஜக தொண்டர்கள் கட்சி துண்டுகளை அசைத்து ஆரவாரம் செய்தானர். அரங்கமே அதிரும் அளவுக்கு அண்ணாமலைக்கு தொண்டர்கள் ஆரவாரம் செய்தனர். அவர்களை அமைதி காக்கும்படி அண்ணாமலை செய்கை செய்தார்.

மதுரையில் பாஜக மூத்த நிர்வாகி ராம சீனிவாசன் செய்தியாளர்களிடம் பேசுகையில், விரைவில் கட்சியின் புதிய தேசிய தலைவர் தேர்வு செய்யப்படுவார். அதன் பின்னர் தேசிய நிர்வாகிகள் நியமிக்கப்படுவார்கள். அதில் அண்ணாமலைக்கு முக்கிய பொறுப்பு கிடைக்கும் என்ற தகவலை பகிர்ந்தார்.

அண்ணாமலை சஸ்பென்ஸ்

இதேபோல, மதுரை விமான நிலையம் வந்த அண்ணாமலையிடம் தேசிய பதவி தொடர்பாக கேள்வி எழுப்பப்பட்டது. அதற்கு, 14ந்தேதி மீண்டும் மதுரை வருகிறேன். அதுவரை பொறுங்கள். அப்போது உங்களிடம் விரிவாக கூறுவேன் என கூறிச் சென்றார்.

இதனால் அண்ணாமலைக்கு பாஜகவில் தேசிய பதவி கிடைக்குமா? அது என்ன பதவியாக இருக்கும் என்ற யூகங்கள் கிளம்பியுள்ளன.