வைகாசி விசாகம் 2025 ! விரதம் இருக்க முடியாதவர்கள், இதை செய்யலாம், முருகனின் அருள் பரிபூரணமாகக் கிடைக்கும்

உலகம் முழுவதிலுமுள்ள முருகன் கோவிலில் இன்று, ஜூன் 9, 2025 வைகாசி விசாகத் திருவிழா கோலாகலமாகக் கொண்டாடப்படுகிறது. கலியுக தெய்வமாக கருதப்படும் முருகப்பெருமான் அவதரித்த திருநாள் தான் வைகாசி விசாகம். வைகாசி மாதம், சந்திரன் விசாக நட்சத்திரத்தில் சஞ்சரிக்கும் நாளில் பௌர்ணமி திதி தோறும் நாளில், முருகன் சிவபெருமானின் நெற்றிக்கண்ணில் இருந்து அவதரித்தார். எப்படி விரதம் இருந்து வழிபட்டாலும் முருகப்பெருமான் அருள் புரிவார்.

படிக்க: விசாகம் நட்சத்திரத்தில் பிறக்கும் குழந்தைகளுக்கு என்ன பெயர் வைக்கலாம்

அசுர சக்திகளை வேரோடு அழிக்க முருகப்பெருமான் அவதரித்த தினத்தன்று எல்லாம் முருகன் கோவில்களிலுமே பக்தர்கள் விரதம் இருந்து காவடி எடுத்து பாத யாத்திரை சென்று பக்தியை வெளிப்படுத்தி வழிபடுவார்கள்.

முருகப்பெருமான் சிவபெருமானின் நெற்றிக்கண்ணிலிருந்து உதித்தவர், ஆறு தீப்பொறிகளாக அவதரித்த முருகப்பெருமான், ஆறு கார்த்திகை பெண்களால் வளர்க்கப்பட்டவர். இதனால் தான் முருகனுக்கு ஆறு விளக்குகள் ஏற்றுவது விசேஷமானது. வீட்டிலேயோ அல்லது முருகன் கோவிலில், ஆறு அகல் விளக்குகள் ஏற்றி மனதார முருகனை வேண்டிக் கொள்ளுங்கள். இது போன்ற விசேஷமான நாட்களில், செவ்வாய் மற்றும் வெள்ளிக்கிழமைகளில், முருகப்பெருமானுக்கு ஆறு அகல் விளக்குகளை ஏற்றி மனதார வழிபாடு செய்தாலே, முருகனின் அருள் கிடைக்கும்.

வெற்றிலையில் முருகப்பெருமானுக்கு விளக்கேற்றுவது மிக விசேஷமானது. தடைகளை நீக்கி, வேண்டிய வரங்களைக் கொடுக்கும் என்பது ஐதீகம். திருமணத் தடை, சொந்த வீடு அமைய வேண்டிய பிரார்த்தனை, சொத்து தகராறு உள்ளிட்ட பிரச்சனைகள் தீரும். காரிய சித்தி உண்டாகும். தொடர்ச்சியாக ஆறு வாரங்கள் அல்லது ஆறு சஷ்டி திதிகள், அல்லது ஆறு மாதம் கிருத்திகை நட்சத்திரம் வரும் நாள் போன்றவற்றில் வெற்றிலை வைத்து ஆறு அகல் விளக்கு ஏற்றினால், நினைத்தது கைகூடும்.

முருகப்பெருமானுக்கு உரிய மிக விசேஷமான வழிபாட்டு முறைகளில் ஒன்று, துவரை விளக்கு. ஒரு தட்டு அல்லது வாழை இலையில் துவரம்பருப்பை பரப்பி, அதன் மீது விளக்கேற்றுவது தான் துவரை விளக்காகும். அல்லது அகல் விளக்கில் நெய் விடு, அதில் கொஞ்சம் துவரபருப்பை சேர்த்து விளக்கேற்றவும். நல்ல வேலை, பெரிய வளர்ச்சி, பொருளாதாரத்தில் பெரிய முன்னேற்றம், கடன் நெருக்கடிகள் தீர உதவும் மிக எளிமையான பரிகாரமாகும். ஜாதகத்தில் இருக்கும் செவ்வாய் தோஷம் அல்லது செவ்வாய் பலவீனமான நிலையில் இருந்தால் கூட, இந்த விளக்கு ஏற்றுவது எதிர்மறையான தாக்கத்தைக் குறைக்கும்.

வைகாசி விசாக நன்னாளில் முருகப்பெருமானை வழிபடுவது, எவ்வளவு கொடிய பகையாக இருந்தாலும் பகையால் உங்களுக்கு ஏற்பட்டிருந்த இன்னல்களையும் போக்கும் என்பது நம்பிக்கை. அசுரர்களை அழிக்க முருக பெருமான் அவதரித்த நாளில் முருகனை மனதார பிரார்த்தனை செய்து கொண்டால் உங்கள் எதிரிகள் காணாமல் போவார்கள் பகை விலகும்.